Ekopolitsiya reydida mojaro: brakonyerlar ekopolitsiya xodimiga tan jarohati yetkazdi
Buxoroda muhofaza etiladigan hududda quyonni noqonuniy ovlagan besh fuqaro aniqlandi.
Buxoro viloyatining Peshku tumanida muhofaza etiladigan hududda noqonuniy ov qilgan besh nafar fuqaro ekopolitsiya xodimlarining qonuniy talablariga bo‘ysunmay, ularga qarshilik ko‘rsatgan. Hodisa oqibatida xodimlardan biri tan jarohati olib, shifoxonaga yotqizilgan.
Viloyat Ekologiya boshqarmasi ma’lumotiga ko‘ra, Peshku tumanidagi Qorakir massivida ekopolitsiya xodimlari tomonidan reyd tadbiri o‘tkazilgan.
Tekshiruv davomida tumanda yashovchi besh nafar fuqaro muhofaza etiladigan hududda taqiqlangan tungi yoritish moslamasi va ov qurolidan foydalanib, noqonuniy ov qilgani aniqlangan. Natijada jami 13 ta quyon ovlangani ma’lum bo‘lgan.
Holatni aniqlashtirish jarayonida xodimlar harakatlanib kelayotgan UAZ rusumli avtomobilni tekshirish uchun to‘xtatgan. Biroq avtomobildagi fuqarolar ularning qonuniy talablariga bo‘ysunmay, qarshilik ko‘rsatgan.
Hodisa davomida ekopolitsiya xodimlaridan biri tan jarohati olgan. Unga birinchi tibbiy yordam ko‘rsatilib, shifoxonaga yotqizilgan. Voqea joyiga tuman ichki ishlar bo‘limi xodimlari ham jalb etilgan.
Ayni paytda holat yuzasidan prokuratura organlari tomonidan tergovga qadar tekshiruv olib borilmoqda. Tekshiruv yakunlari bo‘yicha qo‘shimcha ma’lumot berilishi bildirilgan.
