Ukrainaga 6,6 milliard yevro ajratiladi: YI shartlarni kelishib oldi
Yevropa Tinchlik jamg‘armasidan ajratiladigan mablag‘ uch yo‘nalishda taqsimlanadi.
Yevropa Ittifoqiga a’zo davlatlar Ukrainaga Yevropa Tinchlik jamg‘armasidan 6,6 milliard yevro ajratish shartlari bo‘yicha kelishib oldi. Mablag‘lar harbiy yordam va tegishli xarajatlarni moliyalashtirishga yo‘naltiriladi.
Bu haqda YIning tashqi ishlar va xavfsizlik siyosati bo‘yicha oliy vakili Kaya Kallas ma’lum qildi.
Kelishuvga ko‘ra, 900 million yevro Ukrainaga harbiy yordam ko‘rsatish bo‘yicha YI missiyasini moliyalashtirishga yo‘naltiriladi. Yana 1 milliard yevro yangi qo‘shma uskunalar xaridiga sarflanadi.
Qolgan 4,7 milliard yevro esa YIga a’zo davlatlarning xarajatlarini qoplash uchun ajratiladi. Kallasning bildirishicha, ayrim davlatlar o‘z ulushini Ukraina ehtiyojlariga yo‘naltirishini ma’lum qilgan.
Kallas bu qarorni Ukraina uchun yaxshi, Rossiya uchun esa yomon yangilik deb atagan. Uning ta’kidlashicha, Rossiyaning gibrid hujumlari Yevropani Ukrainani qo‘llab-quvvatlashni kamaytirishga undashga qaratilgan, biroq Yevropa buning aksini qilmoqda.
Avvalroq YI rasmiylari Yevropa Tinchlik jamg‘armasida bloklangan 6,6 milliard yevroni qanday yo‘naltirish masalasini muhokama qilayotganini bildirgan edi.
