Dunyo bo‘ylab gumanitar yordam: Yevropa Ittifoqi 710 mln yevro ajratadi

Yevropa Ittifoqi mojarolar, tabiiy ofatlar va boshqa inqirozlardan jabr ko‘rganlarga qo‘shimcha 710 mln yevro miqdorida gumanitar yordam ajratadi.

 

Bu haqda Yevrokomissiya rahbari Ursula fon der Lyayen 26-sentyabr kuni Nyu-Yorkdagi Global Citizen Festival ishtirokchilariga yo‘llagan videomurojaatida ma’lum qildi. Festival keyinchalik noqulay ob-havo sabab bekor qilingan.

 

Mablag‘larni taqsimlashda Afrikaga, shuningdek, majburiy ko‘chirilgan shaxslar va ularni qabul qilayotgan jamoalarga alohida e’tibor qaratiladi. Xususan, Sahroi Kabirdan janubdagi Afrika mamlakatlarida migratsiya bilan bog‘liq chora-tadbirlarga qariyb 380 mln yevro yo‘naltiriladi.

 

Yana 252 mln yevro qurolli mojarolar, aholining majburiy ko‘chirilishi, epidemiyalar va tabiiy ofatlar oqibatlariga qarshi shoshilinch yordam ko‘rsatishga sarflanadi. Ushbu mablag‘ning 97 mln yevrosi Sahroi Kabirdan janubdagi Afrika mamlakatlariga, 103 mln yevrosi Falastin hududlari va Livanga, 52 mln yevrosi esa Ukrainaga, jumladan, qishga tayyorgarlik ko‘rish uchun yo‘naltiriladi.

 

2026-yilda YI dunyo bo‘ylab gumanitar yordam uchun qariyb 1,9 mlrd yevro ajratishni rejalashtirgan. Shundan 557 mln yevrosi Sahroi Kabirdan janubdagi Afrika mamlakatlariga, 463 mln yevrosi Yaqin Sharq va Shimoliy Afrikaga mo‘ljallangan.

 

Ukraina va Moldovaga yo‘naltiriladigan gumanitar yordam hajmi esa yil davomida 248 mln yevrogacha oshirilgan. Ushbu mablag‘lar oziq-ovqat, tibbiy yordam, uy-joylarni tiklash, pul to‘lovlari va qishga tayyorgarlik ko‘rishga yo‘naltiriladi.

 

Yevrokomissiya ma’lumotlariga ko‘ra, Rossiya Ukrainaga qarshi keng ko‘lamli urush boshlaganidan beri YI Ukrainadagi gumanitar yordam dasturlariga 1,4 mlrd yevrodan ortiq mablag‘ ajratgan.