“Bu juda kichik narx”: Tramp Eron bilan urushda AQSh shaharlari vayron bo‘lishi mumkinligini aytdi
Eron bilan mojaroda Los-Anjeles va San-Diegoga zarar yetishi mumkin.
AQSh prezidenti Donald Tramp Eron bilan ehtimoliy harbiy mojaro oqibatlari haqida gapirar ekan, Kaliforniyadagi Los-Anjeles va San-Diego shaharlari vayron bo‘lishi mumkinligini aytdi.
Tramp bu haqda Nebraska shtatining Grand-Aylend shahrida o‘tkazilgan mitingda so‘zlagan.
Uning ta’kidlashicha, Yaqin Sharqdagi harbiy harakatlar sabab yoqilg‘i va boshqa tovarlar narxining oshishi tinchlik hamda AQSh xavfsizligini ta’minlash uchun to‘lanadigan narxdir.
“Ular shaharni vayron qilishlari mumkin. Los-Anjelesni vayron qilishsin, San-Diegoni vayron qilishsin. Bu juda kichik narx va barchasi juda tez orada tugaydi”, — degan Tramp.
AQSh prezidenti bunday ehtimoliy yo‘qotishlar mamlakatning qo‘ygan maqsadlariga erishishiga to‘sqinlik qilmasligini bildirgan.
Shuningdek, Tramp Eron bilan bog‘liq vaziyat yuzasidan AQSh oldida keyingi qadamlarni belgilash zarurati turganini aytgan. U mojaro “yaxshi yoki yomon” ssenariy bo‘yicha rivojlanishi mumkinligini bildirgan.
Trampning Los-Anjeles va San-Diego haqidagi bayonotlari uning Eron bilan ehtimoliy harbiy mojaro uchun AQSh zimmasiga olishga tayyor bo‘lgan xavflar haqidagi fikrlari doirasida yangragan.
