Yo‘lovchilar xavfsizligi xavf ostida: avtobus haydovchisi jazolandi
Toshkentda haydovchi avtobusni eshiklari ochiq holda boshqardi.
Ijtimoiy tarmoqlarda avtobus haydovchisining yo‘lovchilar xavfsizligi talablarini buzayotgani aks etgan video tarqaldi.
Mazkur holat “Toshshahartransxizmat” AJ masʼullari tomonidan o‘rganib chiqildi.
O‘rganish davomida 2026-yil 4-oktabr kuni haydovchi texnik jihatdan soz avtobusni harakatlanish vaqtida eshiklarini yopmasdan boshqargani va lavozim yo‘riqnomasi talablarini buzgani aniqlangan.
Qoidabuzarlik yuzasidan haydovchiga belgilangan tartibda intizomiy chora ko‘rilgan. Jumladan, 2026-yil 5-oktabrdagi 88-son buyruqqa asosan, uning oylik ish haqining 10 foizi miqdorida jarima qo‘llangan.
“Toshshahartransxizmat” AJ yo‘lovchilar xavfsizligini taʼminlash, avtobuslardan foydalanish qoidalariga qatʼiy rioya etish hamda haydovchilarning xizmat vazifalarini masʼuliyat bilan bajarishini taʼminlash doimiy nazoratda ekanini maʼlum qilgan.
Shuningdek, bunday holatlarning takrorlanishining oldini olish maqsadida nazorat choralari kuchaytirilgani bildirilgan.
