O‘zbekiston Prezidenti MDH mamlakatlari milliy taomlari festivalida bo‘ldi
Tadbirda MDH mamlakatlari milliy oshxonasining pazandachilik an’analari namoyish etildi.
O‘zbekiston Prezidenti Shavkat Mirziyoyev Mustaqil Davlatlar Hamdo‘stligi mamlakatlari delegatsiyalari rahbarlari bilan birgalikda Turkmanistonning “Avaza” milliy sayyohlik zonasida o‘tkazilgan milliy taomlar festivalida ishtirok etdi.
Tadbirda MDHning to‘qqiz mamlakati — O‘zbekiston, Ozarbayjon, Armaniston, Belarus, Qozog‘iston, Qirg‘iziston, Rossiya, Tojikiston va Turkmanistonning milliy oshxonasi pazandachilik an’analari namoyish etildi.
O‘zbekiston ekspozitsiyasida mamlakatning turli hududlariga xos non va pishiriqlar, qandolat mahsulotlari hamda quritilgan mevalar taqdim qilindi. Mehmonlarga o‘zbek nonvoychiligining qadimiy an’analari haqida ma’lumot berildi.
Shuningdek, festival mehmonlari somsaning turli turlari, Xorazmga xos shivit oshi va tuxumbarak tayyorlanish jarayonlarini tomosha qildi. O‘zbek palovining turli ko‘rinishlari va milliy oshxonaning boshqa taomlari ham namoyish etildi.
O‘zbekiston stendida milliy hunarmandchilik mahsulotlariga ham alohida o‘rin berildi. Rishton, Buxoro, Marg‘ilon va Samarqandlik hunarmandlar o‘z mahsulotlari hamda ularni tayyorlashning an’anaviy usullarini ko‘rsatib berdi.
Milliy kuy-qo‘shiqlar va raqslar festivalga o‘ziga xos bayramona kayfiyat bag‘ishladi.
Shavkat Mirziyoyev va boshqa delegatsiyalar rahbarlari O‘zbekiston ekspozitsiyasi bilan tanishganidan so‘ng festivalda taqdim etilgan boshqa mamlakatlarning milliy taomlari va madaniy namunalari bilan ham tanishdi.
