“Samarqand global savdo chorrahasi” — Rubio
AQSh Davlat kotibining aytishicha, yuzlab Amerika kompaniyalari O‘zbekistonga uzoq muddatli hamkorlik uchun kelgan.
Marko Rubio o‘z sahifasida e’lon qilgan videolavhasida Samarqandning xalqaro savdo markazi sifatidagi tarixiy ahamiyatiga to‘xtaldi.
Uning ta’kidlashicha, Samarqandning global savdo chorrahasi sifatidagi o‘rni bugun yana tiklanmoqda. Rubio Vashington dunyo bo‘ylab hamkorlik aloqalarini kengaytirayotganini va bu jarayonda O‘zbekiston muhim o‘rin tutishini bildirdi.
Davlat kotibi yuzlab Amerika kompaniyalari O‘zbekistonga aniq kelishuvlar tuzish va uzoq muddatli hamkorlikni yo‘lga qo‘yish maqsadida kelganini qayd etdi.
“Yer yuzida Samarqand kabi global savdoda tarixan muhim rol o‘ynagan joylar kamdan-kam uchraydi. Bugun bu yerda bo‘lib, nafaqat tarixni yodga olish, balki kelajak uchun imkoniyatlar haqida fikr yuritish men uchun sharafdir”, — dedi Rubio.
Uning so‘zlariga ko‘ra, AQSh savdo, ilm-fan va texnologiyalar sohalarida O‘zbekiston bilan hamkorlikni rivojlantirish uchun katta imkoniyatlarni ko‘rmoqda.
