“Bundan ham kuchli zarbalar olasiz” — Netanyaxu
Isroil Bosh vaziri mamlakat dushmanlariga yanada kuchli zarbalar berilishi mumkinligini bildirdi.
Benyamin Netanyaxu mamlakat harbiy-havo kuchlari bazalaridan biriga tashrif buyurib, Isroil dushmanlariga qarshi yanada kuchli zarbalar berilishi mumkinligini bildirdi. Bu haqda bosh vazir devoni e’lon qilgan videoda ma’lum qilindi.
Netanyaxu baza qo‘mondoni bilan suhbatlashganini va harbiylarning tayyorgarligi, qat’iyati hamda zarur bo‘lganda dushmanlarga zarba berish qobiliyatidan taassurot olganini aytgan.
“Dushmanlarimizga aytaman: bizni sinab ko‘rmang. Siz hozirgacha olgan zarbalaringizdan ham kuchliroq zarbalarga duch kelasiz”, — degan u.
Bosh vazir, shuningdek, Isroil harbiy-havo kuchlari uchuvchilari, yer usti ekipajlari, Isroil mudofaa armiyasi (IDF) va hukumat faoliyati natijasida mamlakat katta yutuqlarga erishganini ta’kidlagan.
Avvalroq Netanyaxu Isroil 27-oktabrga belgilangan parlament saylovlari arafasida raqiblarining hujumlariga duch kelishi mumkinligini aytgan edi. Shuningdek, u mamlakatning yangilangan milliy xavfsizlik konsepsiyasini taqdim etib, ehtimoliy tahdidlarga qarshi oldindan zarba berish muhimligini ta’kidlagan.
