“O‘zbekneftgaz” va CNPC hamkorligi: “M-25” konidagi avariya oqibatlarini bartaraf etish masalasi ko'rib chiqildi
Dunyoning beshta eng yirik energetika giganti qatoriga kiruvchi Xitoy milliy neft-gaz korporatsiyasi prezidenti Chjou Sinxuay boshchiligidagi delegatsiya O'zbekistonga keldi.
“O‘zbekneftgaz” AJ boshqaruvi raisi Abdug‘ani Sanginov Xitoy milliy neft-gaz korporatsiyasi (CNPC) prezidenti Chjou Sinxuay boshchiligidagi delegatsiya bilan uchrashdi.
Muzokaralarda O‘zbekiston va Xitoy o‘rtasidagi neft-gaz sohasidagi hamkorlikni kengaytirish, mavjud loyihalarni jadallashtirish hamda yangi tashabbuslarni amalga oshirish masalalari ko‘rib chiqildi. CNPC “O‘zbekneftgaz”ning muhim hamkorlaridan biri ekani ta’kidlandi.
Tomonlar burg‘ilash, geologiya-qidiruv, seysmik tadqiqotlar, konlarning gaz berish samaradorligini oshirish, raqamlashtirish, loyihalash va zamonaviy uskunalar yetkazib berish yo‘nalishlaridagi hamkorlik natijalarini muhokama qildi. CNPC tarkibidagi Xibu, BGP, CCDC va CNLC kompaniyalari ishtirokidagi loyihalar ham ko‘rib chiqildi.
Uchrashuvda “M-25” konidagi avariya oqibatlarini bartaraf etish masalasiga alohida e’tibor qaratildi. Ushbu loyiha doirasida qutqaruv quduqlarini burg‘ilash rejalashtirilgani qayd etildi.
Shuningdek, ichki bozorni yoqilg‘i bilan barqaror ta’minlash uchun neft mahsulotlarini yetkazib berish manbalarini diversifikatsiya qilish masalasi muhokama qilindi. Tomonlar uzoq muddatli yetkazib berish mexanizmlarini ishlab chiqish va tegishli kompaniyalar o‘rtasidagi hamkorlikni muvofiqlashtirishga tayyorligini bildirdi.
Hamkorlikni rivojlantirish doirasida Toshkent shahrida CNPCning doimiy vakolatxonasini tashkil etish, qo‘shma loyihalarni muvofiqlashtirish uchun ma’muriy infratuzilma yaratish hamda ijtimoiy tashabbuslarni rivojlantirish takliflari ham ilgari surildi.
Kadrlar tayyorlash masalasida esa I. M. Gubkin nomidagi neft va gaz universitetining Toshkent shahridagi filialini qo‘llab-quvvatlash muhokama qilindi. Ushbu tashabbus neft-gaz sohasi uchun malakali muhandis-texnik mutaxassislar tayyorlashga qaratilgan.
Uchrashuv yakunida tomonlar hamkorlikni chuqurlashtirish, yangi texnologik yechimlarni joriy etish va qo‘shma loyihalarni amaliy natijalarga yo‘naltirishga tayyor ekanini bildirdi.
