Tibbiyot xodimlari diqqatiga: davlat ro‘yxatidan o‘tish majburiy bo‘ladi
Yangi tartibga ko'ra, tibbiyot va farmatsevtika faoliyati bilan faqat tegishli mutaxassislik bo‘yicha davlat ro‘yxatidan o‘tgan shaxslar shug‘ullanishi mumkin.
Hukumatning 2026-yil 19-oktabrdagi 577-son qarori bilan tibbiyot va farmatsevtika xodimlarini davlat ro‘yxatidan o‘tkazish tartibi to‘g‘risidagi nizom tasdiqlandi.
Qarorga muvofiq, 2030-yil 1-yanvardan boshlab tibbiyot va farmatsevtika faoliyati bilan shug‘ullanish huquqi muayyan mutaxassislik bo‘yicha davlat ro‘yxatidan o‘tgan shaxslarga besh yil muddatga beriladi. Davlat ro‘yxatidan o‘tmagan shaxslarning tegishli kasbiy faoliyat bilan shug‘ullanishi taqiqlanadi.
Mazkur jarayon uchun mas’ul vakolatli organ — Tibbiyot va farmatsevtika xodimlarining malakasini baholash markazi hisoblanadi.
2027-yil 1-iyuldan 2030-yil 1-yanvargacha bo‘lgan davrda xodimlar mutaxassisligi bo‘yicha davlat ro‘yxatidan ixtiyoriy tartibda o‘tkaziladi. Bunda maxsus imtihon natijalari yoki malaka toifasini berish jarayoni asos bo‘ladi. Malaka toifasi berilayotganda davlat ro‘yxatidan o‘tkazish avtomatik tarzda amalga oshirilishi mumkin.
Mutaxassisligi bo‘yicha kamida 20 yillik ish stajiga va ilmiy darajaga ega xodimlar maxsus imtihonsiz davlat ro‘yxatidan o‘tkaziladi. Biroq murojaat sanasiga qadar mutaxassisligi bo‘yicha uch yil yoki undan ortiq vaqt davomida uzluksiz kasbiy faoliyat yuritmagan xodimlar bundan mustasno.
Davlat ro‘yxatidan o‘tish uchun Davlat xizmatlari markazlari, Yagona interaktiv davlat xizmatlari portali yoki Tibbiy malaka platformasi orqali murojaat qilish mumkin. Elektron arizalar dam olish va bayram kunlaridan qat’i nazar, sutkaning istalgan vaqtida yuboriladi.
Vakolatli organ kelib tushgan so‘rovnomani besh ish kuni ichida o‘rganib, talabgorni maxsus imtihonga qo‘yish yoki qo‘ymaslik haqida qaror qabul qiladi.
Davlat ro‘yxatidan o‘tganlik to‘g‘risidagi guvohnoma elektron shaklda rasmiylashtiriladi. Uni Tibbiyot va farmatsevtika mutaxassislarining yagona elektron reyestri orqali tekshirish mumkin. Guvohnomaning qog‘oz shaklidagi asl nusxasi yoki dublikati berilmaydi.
Kasbiy faoliyatni davom ettirish uchun xodimlar har besh yilda qayta davlat ro‘yxatidan o‘tishi lozim.
Qaror rasmiy e’lon qilingan kundan e’tiboran uch oy o‘tgach kuchga kiradi.
