“Madad” maxsus qutqaruv markazi tashkil etiladi: tizim yangilanadi

Prezident Shavkat Mirziyoyev favqulodda vaziyatlarga tezkor javob berish tizimini takomillashtirish, suv omborlari xavfsizligini ta’minlash va ulardan foydalanishni tartibga solish bo‘yicha taqdimot bilan tanishdi.

 

Taqdimotda qutqaruv xizmatlari faoliyatini zamonaviy talablar asosida yangilash masalalari ko‘rib chiqildi. Xususan, qutqaruvchilarning yetib kelish vaqtini shahar hududlarida 5–7 daqiqaga, shahar markazlaridan tashqarida esa 15–20 daqiqaga qisqartirish vazifasi belgilandi.

 

Aholisi 250 mingdan ortiq tuman va shaharlardagi 25 ta yong‘in-qutqaruv qismini qayta tashkil etish va zamonaviy texnika bilan ta’minlash rejalashtirilmoqda. Shuningdek, murakkab sharoitlarda ishlaydigan “Madad” milliy ko‘p tarmoqli maxsus qutqaruv markazi, aviatsiya-qutqaruv bo‘limi hamda favqulodda vaziyatlarni boshqarish bo‘yicha ilmiy-tadqiqot markazini tashkil etish taklif qilindi.

 

“112” yagona dispetcherlik xizmati faoliyatini takomillashtirish, murojaatlarni qabul qilishdan boshlab ularning ijrosigacha bo‘lgan jarayonni kuzatish va xizmatlar o‘rtasida axborot almashinuvini kuchaytirish masalalari ham muhokama qilindi. Bu jarayonlarda raqamli texnologiyalar va sun’iy intellektdan kengroq foydalanish zarurligi ta’kidlandi.

 

Suv omborlaridagi xavfsizlik masalasiga ham alohida e’tibor qaratildi. Hozirda mavjud 56 ta suv omborining faqat to‘rttasida qutqaruv xizmati tashkil etilgan. Shu munosabat bilan “Karkidon” suv ombori misolida professional qutqaruv tizimini yo‘lga qo‘yish taklif etildi.

 

Bundan tashqari, qutqaruvchilarni tayyorlash texnikumida dual ta’lim asosida qutqaruvchi-g‘avvoslarni tayyorlash, turizm obyektlari xodimlarini favqulodda vaziyatlarda harakat qilish va birinchi yordam ko‘rsatishga o‘rgatish rejalashtirilmoqda.

 

Prezident tizimni yangilashda inson hayotini saqlab qolish asosiy mezon bo‘lishi kerakligini ta’kidladi.