Baliqchilik va limonchilik: minglab oilalar daromadi oshiriladi
O‘zbekistonda 4 mingdan ortiq quduq negizida baliqchilikni rivojlantirish, 200 gektar maydonda energotejamkor issiqxonalar qurish rejalashtirilmoqda.
Prezident Shavkat Mirziyoyev intensiv baliqchilikni rivojlantirish va energotejamkor limonchilik issiqxonalarini tashkil etish bo‘yicha taqdimot bilan tanishdi. Loyihalar orqali yangi ish o‘rinlari yaratish va aholi daromadlarini oshirish rejalashtirilmoqda.
Mamlakatda yiliga 1 million tonna baliq yetishtirish maqsad qilingan. Shu munosabat bilan Andijon viloyatining Baliqchi tumanidagi 24 ta meliorativ tik quduq atrofida intensiv baliqchilik majmualarini tashkil etish taklif qilindi.
Har biri 50 sotix maydonni egallaydigan loyihalarda yiliga kamida 30 tonna forel yetishtirish va 10 ta ish o‘rni yaratish ko‘zda tutilgan. Baliqchilik jarayonlarini yagona tizimda boshqarish uchun xolding tashkil etish ham taklif qilindi.
Baliqchi tajribasini boshqa hududlarda qo‘llash maqsadida 2027-yil 1-martga qadar respublikadagi 4 mingdan ortiq meliorativ tik quduq xatlovdan o‘tkaziladi. Baliq yetishtirishga yaroqli quduqlarni ilg‘or tadbirkorlarga davlat-xususiy sheriklik asosida boshqaruvga berish rejalashtirilgan. Xonobodda sovuq suv baliqlarini yetishtirish va qayta ishlash, Ulug‘norda esa suv havzalari negizida baliqchilik loyihalarini amalga oshirish ham ko‘zda tutilmoqda.
Taqdimotda limonchilikni rivojlantirish masalasi ham ko‘rib chiqildi. Baliqchi tumanidagi to‘qqizta mahalla atrofida 100 gektar maydonda energotejamkor issiqxonalar qurib, ularni tayyor holda tadbirkorlarga taklif etish rejalashtirilgan. Limon yetishtirishdan tortib, uni qayta ishlash, qadoqlash, saqlash va sotishgacha bo‘lgan jarayonlar yagona kooperatsiya tizimiga birlashtiriladi.
Dastlabki hisob-kitoblarga ko‘ra, 500 ta issiqxonada mahalliy oilalardan kamida 1 ming kishi ish bilan ta’minlanadi. Limon ko‘chatlari hosilga kirguniga qadar oraliq ekinlar yetishtirish orqali ham qo‘shimcha daromad olish imkoniyati yaratiladi.
Baliqchi tajribasi asosida kelgusi yilda hududlarda jami 200 gektar maydonda energotejamkor issiqxona majmualari barpo etish rejalashtirilgan. Bu orqali kambag‘al oilalar va ishsizlarni qamrab olib, 2 mingta oilaning daromadini oshirish ko‘zda tutilmoqda.
Taqdimot yakunida davlat rahbari loyihalarni moliyaviy qo‘llab-quvvatlash hamda aholini baliqchilik va limonchilikka o‘qitish xarajatlarini qoplash bo‘yicha mutasaddilarga topshiriqlar berdi.
