Hovli tagida va yo‘l chetidagi “boylik”: 5,5 kg opiy topildi
Samarqand va Xorazmda giyohvandlik moddalarining noqonuniy aylanmasiga chek qo‘yildi.
Davlat xavfsizlik xizmati Samarqand va Xorazm viloyatlarida Bojxona hamda Ichki ishlar organlari bilan hamkorlikda o‘tkazilgan tezkor tadbirlar davomida katta miqdordagi giyohvandlik moddasini noqonuniy muomalaga kiritish bilan bog‘liq holatlar aniqlandi.
Birinchi holat Samarqand viloyatining Urgut tumanida qayd etilgan. Tezkor ma’lumot asosida 1973-yilda tug‘ilgan fuqaroning yashash xonadoni xolislar ishtirokida ko‘zdan kechirilganda, uning hovlisiga ko‘mib qo‘yilgan sof og‘irligi 4 kilogramm 988 gramm “opiy” moddasi topilib, ashyoviy dalil sifatida rasmiylashtirilgan.
Ikkinchi holat Xorazm viloyatida aniqlangan. “Surxondaryo — Xorazm” yo‘nalishida harakatlanayotgan “Cobalt” rusumli avtomobil “Sarimoy” blok-postida to‘xtatilgan. Avtomobilda Termiz shahrida yashovchi, 1989-yilda tug‘ilgan ikki nafar fuqaro bo‘lgan.
Ularning uyali aloqa vositalari ko‘zdan kechirilganda, Buxoro viloyatining Romitan tumani hududidan o‘tuvchi A-380 xalqaro avtomobil yo‘lining bir qismida giyohvandlik moddasi yashirilgani ma’lum bo‘lgan. Ko‘rsatilgan joydan 539 gramm “opiy” moddasi olingan.
Dastlabki ma’lumotlarga ko‘ra, fuqarolar ushbu moddani Xorazm viloyatida sotishni rejalashtirgan.
Hozirda har ikki holat yuzasidan Jinoyat kodeksining 246 va 273-moddalari bilan jinoyat ishlari qo‘zg‘atilib, tergov harakatlari olib borilmoqda.
