Tadbirkorga faxriy unvon, kitobxon oilalarga uy: Qashqadaryodagi yig‘ilishda nimalar aytildi?

 

Prezident Shavkat Mirziyoyev Qashqadaryo viloyatini ijtimoiy-iqtisodiy rivojlantirish masalalariga bag‘ishlangan yig‘ilish o‘tkazmoqda.

 

Davlat rahbari hosil yig‘im-terimi qizg‘in kechayotgan kunlarda qashqadaryoliklar bilan uchrashib turganidan mamnunligini bildirdi. Shuningdek, yig‘ilish ishtirokchilarini O‘zbek tili bayrami bilan tabriklab, Qashqadaryo farzandi, O‘zbekiston Qahramoni va davlat madhiyasi muallifi Abdulla Oripovni yodga oldi.

 

Prezident bir necha yil avval eng murakkab vaziyatdagi hududlardan biri bo‘lgan Qashqadaryoni yil yakuniga qadar kambag‘allik va ishsizlikdan xoli hududga aylantirish maqsad qilinganini ta’kidladi. Uning qayd etishicha, bu natijaga erishish uchun aniq hisob-kitoblar mavjud.

 

“Kecha viloyatning shahar va tumanlarida, mahallalarida bo‘lgan o‘zgarishlarni ko‘rib, tadbirkor, investor, yoshlarning ko‘zlaridagi shijoatni ko‘rib, juda katta kuch oldim”, — dedi davlat rahbari.

 

Yig‘ilishda “Sultonteks” klasteri rahbari Nurbek Ergashevning energiya va suvni tejaydigan zamonaviy korxonasi faoliyati ham tilga olindi. Tadbirkorning 2028-yilgacha yana 30 ming kishini ish bilan ta’minlash, ayniqsa, ayollar uchun ko‘proq imkoniyat yaratish rejalari qo‘llab-quvvatlandi.

 

Prezident Nurbek Ergashevga “O‘zbekistonda xizmat ko‘rsatgan tadbirkor” faxriy unvonini berish to‘g‘risidagi farmonni imzolaganini ma’lum qildi.

 

Shuningdek, Qamashi tumanidagi Chim mahallasida limonchilikni rivojlantirib, aholi daromadlarini oshirishga hissa qo‘shayotgan Abdumannop Xudoyberdiyevga “O‘zbekistonda xizmat ko‘rsatgan qishloq xo‘jaligi xodimi” unvoni berilishi aytildi.

 

Qashqadaryoda ma’rifatni targ‘ib qilayotgan “Mutolaa” loyihasi bosh muharriri Javlon Jovliyevning mehnati ham e’tirof etildi. Bundan tashqari, “Yosh kitobxon oila” respublika tanlovi g‘oliblari Baxtishod Rashidov va E’zoza Xushvaqtovaga Toshkent shahridan ikki xonali yangi xonadonlar sovg‘a qilinishi ma’lum qilindi.

 

Davlat rahbari ushbu mukofotlarni yig‘ilishning o‘zida topshirishni taklif etdi.