Suvni ortiqcha olganlarga moliyaviy jazo: 2027-yildan yangi tartib kuchga kiradi
Suv olish limitidan oshish, shartnomasiz yoki ruxsatnomasiz suv olish qoidabuzarlik hisoblanadi.
Hukumatning 2026-yil 21-oktabrdagi 585-son qarori bilan qishloq xo‘jaligi, baliqchilik, sanoat, energetika va xo‘jalik-maishiy ehtiyojlar uchun suv olish tartibini buzganlik yuzasidan moliyaviy sanksiyalarni qo‘llash tartibi tasdiqlandi.
Qarorga ko‘ra, quyidagi holatlar suv olish tartibini buzish hisoblanadi:
-
belgilangan limitdan ortiqcha suv olish;
-
suv olish shartnomasini rasmiylashtirmasdan suv olish;
-
suv olish joylarini suvni boshqarish va hisobga olish vositalari bilan jihozlamaslik;
-
suvdan maxsus foydalanish uchun ruxsatnomasiz suv olish;
-
o‘zboshimchalik bilan suv olish.
Birinchi marta qoidabuzarlik sodir etilganda Inspeksiya yuridik shaxsni “suvnazorat.uz” elektron platformasi orqali ogohlantiradi va tegishli ko‘rsatma beradi. Qoidabuzarlik 10 kun ichida bartaraf etilmasa, moliyaviy sanksiya qo‘llaniladi.
Sanksiya har ming kub metr suv uchun bazaviy hisoblash miqdori (BHM) asosida, Suv kodeksining 164-moddasida belgilangan foiz miqdorida hisoblanadi. Sanksiya qo‘llanilganidan keyin bir yil ichida qoidabuzarlik takrorlansa, uning miqdori besh baravar etib belgilanadi.
Moliyaviy sanksiyalarni to'lash tartibi
-
Qaror va sanksiya hisob-kitobi olingan kundan boshlab bir oy ichida sanksiya summasining 50 foizi ixtiyoriy to‘lansa, yuridik shaxs qolgan qismini to‘lashdan ozod etiladi.
-
Sanksiya summasini olti oydan kechiktirmasdan, har oyda kamida oltidan bir qismini to‘lash orqali bo‘lib-bo‘lib to‘lash mumkin. Dastlabki to‘lov bir oy ichida amalga oshirilsa, ushbu tartib avtomatik qo‘llanadi.
-
Sanksiya ixtiyoriy to‘langanida, huquqiy ta’sir chorasi qo‘llanilmagan deb hisoblanadi.
Agar sanksiya bir oy ichida ixtiyoriy to‘lanmasa, Inspeksiya sudga da’vo arizasi kiritadi. Qaror ustidan shikoyat berilganida, u ko‘rib chiqilgunga qadar sanksiyani qo‘llash jarayoni va muddati to‘xtatib turiladi.
Sud sanksiyani noqonuniy yoki asossiz deb topsa, to‘langan mablag‘lar 15 kun ichida qaytariladi. Mablag‘ o‘z vaqtida qaytarilmagan har bir kalendar kun uchun Markaziy bank asosiy stavkasining uch yuzdan bir qismi miqdorida foiz to‘lanadi.
