Xitoy AQSh universitetlarida 80 ta targ‘ibot guruhini tashkil etgan — Pit Hegset

AQSh Mudofaa vazirligi Xitoy hukumati tomonidan moliyalashtiriladigan 80 ta targ‘ibot tashkilotini aniqlagan. Ular mamlakatning 30 ta universitetida faoliyat yuritgan. Bu haqda Pentagon rahbari Pit Hegset X ijtimoiy tarmog‘ida e’lon qilingan videomurojaatida ma’lum qildi.

 

Hegsetning aytishicha, vazirlik so‘nggi ikki oy davomida ushbu tashkilotlar faoliyatini tugatish bilan shug‘ullangan. Uning ta’kidlashicha, ular intellektual mulkni o‘zlashtirish va amerikalik talabalarning dunyoqarashiga ta’sir ko‘rsatish bilan shug‘ullangan.

 

Pentagon rahbari mazkur tuzilmalar amalda Xitoyning xalqaro madaniy-ma’rifiy markazlari tarmog‘i bo‘lgan «Konfutsiy institutlari» faoliyatini davom ettirganini ta’kidladi. AQSh universitetlari 2020-yildan keyin ushbu institutlarni ommaviy ravishda yopishni boshlagan. Bunga AQSh Davlat departamentining ularni Xitoyning xorijdagi missiyasi deb tan olishi sabab bo‘lgan.

 

University World News nashrining xabar berishicha, «Konfutsiy institutlari» bilan hamkorlikni to‘xtatgan ayrim ta’lim muassasalari Xitoy hukumatiga millionlab dollar miqdoridagi subsidiyalarni qaytarishga majbur bo‘lgan.

 

Biroq AQSh Milliy olimlar assotsiatsiyasining 2022-yilgi hisobotida ayrim universitetlar Xitoy oliy ta’lim muassasalari bilan yangi hamkorlik shartnomalarini tuzgani, yangi markazlar ochgani va Xitoy hukumatining tegishli idoralaridan mablag‘ olishda davom etgani qayd etilgan.

 

Hegsetning ma’lum qilishicha, AQSh Mudofaa vazirligi ushbu tuzilmalarni milliy xavfsizlikka tahdid soluvchi tashkilotlar ro‘yxatiga kiritgan.

 

«Bu bizning ixtirolarimizni o‘zlashtirishga yoki yoshlarimizni o‘z davlatiga qarshi qayrashga urinayotgan har qanday mamlakat uchun saboq bo‘lsin», — dedi Pentagon rahbari.