Is gazidan zaharlanish xavfi: isitish mavsumida qanday qoidalarga amal qilish kerak?

 

Havo haroratining pasayishi bilan xonadonlarda isitish moslamalaridan foydalanish ko‘paymoqda. Biroq gaz uskunalaridan noto‘g‘ri foydalanish, qo‘lbola yoki nostandart isitish qurilmalarini ishlatish, shuningdek, ularni malakasiz mutaxassislarga o‘rnattirish inson hayoti va salomatligi uchun jiddiy xavf tug‘dirishi mumkin. Bu haqda Energetika vazirligi ogohlantirdi.

 

Vazirlik ma’lumotiga ko‘ra, texnik talablarga javob bermaydigan qozon va isitish moslamalari, noto‘g‘ri ulangan dudburonlar, nosoz shamollatish kanallari hamda himoya tizimlaridagi kamchiliklar is gazidan zaharlanish va boshqa baxtsiz hodisalarga sabab bo‘lishi mumkin.

 

Is gazining rangsiz va hidsiz ekanligi uni o‘z vaqtida aniqlashni qiyinlashtiradi. Shu bois isitish mavsumida xavfsizlik talablariga qat’iy rioya qilish muhim.

 

Energetika vazirligi gaz iste’molchilariga quyidagilarni tavsiya qiladi:

• Faqat xavfsizlik talablariga javob beradigan, soz isitish moslamalaridan foydalaning. Qo‘lbola, nostandart va nosoz qurilmalarni ishlatmaslik;

• Gaz uskunalarini malakali mutaxassislarga o‘rnattiring va texnik holatini muntazam tekshirtirish;

• Dudburon va mo‘rkonlarning sozligini nazorat qiling, ularni qurum va boshqa to‘siqlardan tozalab turish;

• Shamollatish kanallarini berkitmang va havo almashinuvi to‘g‘ri ishlashiga e’tibor berish;

• Gaz plitasidan xonalarni isitish maqsadida foydalanmaslik;

• Isitish moslamalarini nazoratsiz qoldirmang. Nosozlik yoki gaz hidi sezilsa, tegishli xavfsizlik choralarini ko‘ring va mutaxassislarga murojaat qilish.

 

Is gazidan zaharlanishning dastlabki belgilari bosh og‘rig‘i, bosh aylanishi, ko‘ngil aynishi va holsizlik bo‘lishi mumkin. Bunday alomatlar paydo bo‘lsa, darhol toza havoga chiqish, xavfli hududdagi boshqa odamlarni ham olib chiqish va tez tibbiy yordamga murojaat qilish tavsiya etiladi.

 

Vazirlik isitish mavsumida xavfsizlik qoidalariga beparvo bo‘lmaslik, gaz uskunalari va isitish tizimlarini soz holatda saqlash hamda o‘z va yaqinlar hayotini xavf ostiga qo‘ymaslikka chaqirdi.