Yerto‘lada saqlangan 5,6 mlrd so‘mlik dorilar: Namanganda yashirin ombor fosh etildi
Jami 67 923 dona dori protsessual tartibda rasmiylashtirib olingan.
Namangan viloyatida umumiy qiymati taxminan 5,6 milliard so‘mga teng bo‘lgan dori vositalari saqlanayotgan yashirin ombor fosh etildi. Bu haqda Davlat xavfsizlik xizmatining viloyat boshqarmasi xabar berdi.
Ma’lum qilinishicha, DXXning Namangan viloyati bo‘yicha boshqarmasi xodimlari Bojxona va Ichki ishlar boshqarmalari bilan hamkorlikda tezkor tadbir o‘tkazgan.
Tadbir davomida Uychi tumanida farmatsevtika mahsulotlari savdosi bilan shug‘ullanuvchi xususiy korxona rahbari va uning ishchisi bo‘lgan, 1983 va 1986-yillarda tug‘ilgan aka-ukalar noturar binoning yerto‘lasida yashirin ombor tashkil etgani aniqlangan.
Omborni ko‘zdan kechirish jarayonida xorijda ishlab chiqarilgan, kelgusida sotish uchun saqlanayotgan 412 turdagi jami 67 923 dona dori vositasi topilgan. Ularning umumiy taxminiy qiymati 5,6 milliard so‘mni tashkil etadi. Dori vositalari protsessual tartibda rasmiylashtirib olingan.
Hozirda aniqlangan dori vositalari yuzasidan sud-kimyoviy va tovarshunoslik ekspertizalari tayinlangan. Holat bo‘yicha tergovga qadar tekshiruv harakatlari olib borilmoqda.
