Tibbiyotda yangi bosqich: O‘zbekistonda 58 mingta shifo o‘rni yaratildi

 

Prezident Shavkat Mirziyoyevning tibbiyot va farmatsevtika sohasi xodimlari bilan uchrashuvda soha vakillarini yaqinlashib kelayotgan kasb bayrami bilan tabriklab, ularning mehnati uchun minnatdorlik bildirdi.

 

“Inson oilasining baxtini ko‘rishi, halol mehnat qilib, orzulariga yetishi va umrini mazmunli o‘tkazishi uchun, avvalo, sog‘liq kerak. Shu bois, inson salomatligini asrashni islohotlarimizning eng muhim yo‘nalishlaridan biri etib belgilaganmiz”, — dedi Prezident.

 

Ta’kidlanishicha, so‘nggi o‘n yilda mamlakatda 10 million aholiga xizmat ko‘rsatadigan yangi poliklinika va shifoxonalar ishga tushirilib, 58 mingta shifo o‘rni yaratildi. Zamonaviy shifoxonalar sonining ko‘payishi va xususiy sektorga keng imkoniyatlar berilishi natijasida tibbiy xizmatlar hajmi uch karra oshdi.

 

Avval xorijda amalga oshirilgan tug‘ma yurak nuqsonlarini davolash, a’zolar transplantatsiyasi, robot jarrohligi va bosh miyadagi murakkab operatsiyalar kabi yuzdan ortiq turdagi tibbiy xizmatlar bugun O‘zbekistonda ham ko‘rsatilmoqda.

 

Prezident bu natijalarga erishishda tibbiyot xodimlarining bilim va mahorati muhim o‘rin tutayotganini qayd etdi.

 

Uchrashuvda tibbiyotni raqamlashtirish masalasiga ham to‘xtalib o‘tildi. Bu jarayon xususiy klinikalar va dorixonalarni ham qamrab olmoqda. Yaqin vaqt ichida tizim sun’iy intellekt imkoniyatlari bilan boyitilib, shifokor va hamshiralar faoliyatiga ko‘mak berishi rejalashtirilgan.

 

Farmatsevtika sohasida esa mamlakat ehtiyojining 70 foizini mahalliy ishlab chiqarish hisobidan qoplash maqsad qilingan. Shu yo‘nalishda so‘nggi yillarda 1 milliard dollarlik 330 ta yangi ishlab chiqarish quvvati ishga tushirildi.

 

Shuningdek, “Toshkent biofarm siti” klasteri hamda Andijon, Namangan, Jizzax va Toshkent viloyatlarida farmatsevtika erkin iqtisodiy zonalari tashkil etilgan. Ularda umumiy qiymati 1,2 milliard dollarlik loyihalar amalga oshirilmoqda.