Universitetga o‘qishga kiritish va’dasi: 18 mln so‘m olayotgan shaxs qo‘lga tushdi
U fuqaroni universitetning 3-kursiga kiritishni va’da qilib, pul talab qilgan.
Namangan shahrida fuqaroni nodavlat oliy ta’lim muassasasiga o‘qishga kiritib qo‘yishni va’da qilib, 18 million so‘m talab qilgan shaxs ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Ma’lum qilinishicha, gumonlanuvchi fuqaroni Andijon iqtisodiyot va pedagogika universitetining 3-kursiga o‘qishga kiritib qo‘yishini aytib, buning evaziga 18 million so‘m so‘ragan.
Departamentning Namangan viloyati boshqarmasi va Namangan shahar bo‘limi xodimlari tomonidan tezkor tadbir o‘tkazilgan. Gumonlanuvchi kelishilgan pulni olayotgan vaqtida ashyoviy dalillar bilan ushlangan.
Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
