Infarkt va insultdan erta o‘lim 15 foizga kamaydi: dastur barcha hududlarni qamrab oladi

 

Shavkat Mirziyoyev oshqozon, yo‘g‘on ichak, prostata bezi va o‘pka saratonini erta aniqlash ishlari Samarqanddan boshlanishini, 2028-yildan esa mamlakatning barcha hududlarida joriy etilishini ma’lum qildi. Ushbu maqsadlar uchun yiliga 700 milliard so‘m ajratiladi.

 

Qandli diabet, sil, yurak-qon tomir kasalliklari, ayollardagi o‘smalar va bolalardagi onkogematologik kasalliklarni erta aniqlash dasturlari ham davom ettiriladi.

 

Andijon, Farg‘ona, Namangan, Samarqand va Toshkent shahrida infarkt hamda insultni erta aniqlash va davolash dasturi natijasida ushbu kasalliklardan erta o‘lim holatlari besh oyda 15 foizga kamaygan. Kasallik boshlanganidan keyingi “oltin soat”da 855 nafar inson erta o‘lim va nogironlik asoratlaridan saqlab qolingan.

 

Kelasi yili ushbu dastur uchun 280 milliard so‘m ajratilib, u barcha tuman va shaharlarni qamrab oladi.

 

Aholi uchun kafolatlangan tibbiy xizmatlar paketi ham kengaytiriladi. Kelasi yili bepul beriladigan dori vositalari turlari 73 taga, tibbiy tekshiruvlar turlari esa 36 taga yetkaziladi.

 

Shuningdek, ta’lim, tibbiyot muassasalaridagi qurilish, sanitariya-gigiyena, bemorlar xavfsizligi va xodimlar madaniyatini qamrab oluvchi “Yangi O‘zbekiston tibbiyot standartlari” joriy etiladi.

 

“Har qanday inson poliklinikaga kirganda, avvalo, ozodalikni, tartibni, madaniyatni ko‘rishi kerak”, — dedi davlat rahbari.

 

Shu maqsadda birlamchi tibbiy yordam bo‘g‘ini xodimlari bosqichma-bosqich maxsus kiyim-bosh bilan bepul ta’minlanadi.

 

Joriy yilda ilk bor tuman miqyosidagi eng yaxshi shifokor va hamshira nominatsiyalari bo‘yicha viloyat tanlovlari o‘tkazilmoqda. G‘oliblar 30 million so‘mdan mukofotlanadi.

 

Kelasi yildan rag‘batlantirish choralari yanada kuchaytiriladi. Viloyat bosqichida g‘olib bo‘lgan 14 nafar shifokor elektromobil bilan taqdirlanadi. Sog‘lom turmush tarzini targ‘ib qiluvchi eng yaxshi 10 ta loyiha muallifiga esa 200 million so‘mdan grant beriladi.