Ispaniyada ikkita tezyurar poyezd to‘qnashdi: 46 kishi halok bo‘ldi
Halokat vaqtida ikkala poyezdda jami 500 dan ortiq yo‘lovchi bo‘lgan.
Ispaniyaning markaziy qismidagi Toledo provinsiyasida ikkita tezyurar poyezd to‘qnashishi oqibatida kamida 46 kishi halok bo‘ldi, 100 dan ortiq odam jarohatlandi. Bu haqda mahalliy ABC xabar bermoqda.
Hodisa 28-oktyabr kuni mahalliy vaqt bilan soat 08:54 da, Urda shahri yaqinidagi Madrid–Sevilya tezyurar temiryo‘l liniyasida sodir bo‘lgan. Dastlabki ma’lumotlarga ko‘ra, Madrid–Sevilya yo‘nalishida harakatlangan Renfe kompaniyasining AVE poyezdi relsda to‘xtab turgan Iryo kompaniyasiga tegishli poyezdga orqadan urilgan.
To‘qnashuv oqibatida Iryo poyezdining to‘rtta vagoni relsdan chiqib ketgan, ulardan kamida ikkitasi qiyalikdan pastga qulagan. Halokat vaqtida ikkala poyezdda jami 500 dan ortiq yo‘lovchi bo‘lgan.
Voqea joyiga qutqaruvchilar, o‘t o‘chiruvchilar va tibbiyot xodimlari safarbar etilgan. Jabrlanganlarni qutqarish va ularga yordam ko‘rsatish ishlari davom etmoqda.
Halokat sabablarini aniqlash yuzasidan tekshiruv boshlangan. Dastlabki taxminlarga ko‘ra, temiryo‘l harakatini boshqarish tizimidagi nosozlik va inson omili ehtimoliy sabablar qatorida ko‘rib chiqilmoqda. Biroq hodisaning aniq sababi hozircha rasman tasdiqlanmagan.
Avariya sababli Madrid, Syudad-Real va Andalusiya o‘rtasidagi tezyurar poyezdlar qatnovi to‘xtatilgan.
Ispaniya bosh vaziri Pedro Sanches halokatdan chuqur qayg‘uda ekanini bildirib, qurbonlar va ularning yaqinlariga hamdardlik bildirdi.
