AQSh Eronga qarshi zarbalarni 4-noyabr kuni qayta boshlashi mumkin — MS NOW
Vashington Fors ko‘rfazidagi bir nechta davlatni ehtimoliy hujumlarga tayyorgarlik ko‘rish haqida ogohlantirgan.
AQSh oraliq Kongress saylovlaridan keyingi kun — 4-noyabrda Eronga qarshi harbiy zarbalarni qayta boshlashi mumkin. Bu haqda MS NOW telekanali manbalarga tayanib xabar berdi.
Telekanal ma’lumotlariga ko‘ra, AQSh ma’muriyati Fors ko‘rfazidagi bir nechta mamlakatni ehtimoliy “qisqa va shiddatli zarbalar”ga tayyorgarlik ko‘rish zarurligi haqida ogohlantirgan.
Xabarda aytilishicha, Vashingtonning mintaqadagi ittifoqchilari hujumlar qayta boshlansa, Eron tomonidan javob zarbalari berilishidan xavotirda. Shu sababli ular vaziyatni yumshatishga urinmoqda.
Ismi oshkor etilmagan mintaqaviy amaldorning ta’kidlashicha, ayrim Fors ko‘rfazi davlatlari o‘z hududidagi AQSh harbiy bazalaridan Eronga qarshi zarbalar berish uchun foydalanilishiga qarshilik ko‘rsatishi mumkin.
Eron avvalroq ehtimoliy “terroristik hujumlar” yuz bergan taqdirda harbiy reja tayyorlayotganini bildirgan edi. Tehron javob zarbalari doirasini kengaytirib, dushman davlatlar va ularning mintaqaviy ittifoqchilariga tegishli markazlar, inshootlar hamda shtab-kvartiralarni nishonga olishi mumkinligini ma’lum qilgan.
