Ekostiker olmagan haydovchilar jarimaga tortiladimi? YHXX munosabat bildirdi
Ijtimoiy tarmoqlarda ekostiker olmagan haydovchilar 4,4 million so‘m jarimaga tortilishi haqida xabarlar tarqaldi.
Ijtimoiy tarmoqlarda 1-yanvardan boshlab ekologik stiker olmagan haydovchilarga bazaviy hisoblash miqdorining 10 baravari miqdorida, ya’ni 4,4 million so‘m jarima qo‘llanilishi haqida xabarlar tarqaldi. Shuningdek, yangi yildan ekologik stikerlar pulli bo‘lishi haqida ham ma’lumotlar e’lon qilindi.
Ichki ishlar vazirligi Yo‘l harakati xavfsizligi xizmati mazkur xabarlarga munosabat bildirib, ularni tasdiqlovchi qonuniy asoslar mavjud emasligini ma’lum qildi.
Xizmatning bildirishicha, ijtimoiy tarmoqlarda tarqalayotgan ekostiker olmagan haydovchilarni jarimaga tortish va ekologik stikerlarni pulli qilish haqidagi ma’lumotlar amaldagi qonunchilikka asoslanmagan.
YHXX fuqarolarni yo‘l harakati xavfsizligiga oid ma’lumotlarni faqat vakolatli idoralarning rasmiy axborot manbalaridan olishga chaqirdi.
