Yo‘l chizig‘ini bosganlik uchun jarima tartibi o‘zgardi: qaysi joylarda bayonnoma rasmiylashtirilmaydi?
Shuningdek, xavfsizlik kamarini taqmaslik holatlari maxsus avtomatlashtirilgan qurilmalar orqali ham aniqlanishi mumkin.
Vazirlar Mahkamasining 2026-yil 29-oktabrdagi 596-son qaroriga muvofiq, 1-noyabrdan chorrahalar va qayrilib olish joylari yaqinida yo‘l chiziqlarini bosib harakatlangan haydovchilarga nisbatan ma’muriy bayonnoma rasmiylashtirish tartibi o‘zgaradi.
Unga ko‘ra, chorrahagacha bo‘lgan 50 metr va qayrilib olish joylarigacha bo‘lgan 20 metr masofada 1.1 va 1.3 yo‘l yotiq chiziqlarini bosib harakatlanganlik uchun Yo‘l-patrul xizmati inspektorlari tomonidan ma’muriy bayonnoma rasmiylashtirilmaydi.
Shuningdek, qaror bilan haydovchilarning transport vositasini boshqarish va yo‘lovchilarni tashish vaqtida xavfsizlik kamaridan foydalanish qoidalariga rioya etmaslik holatlarini maxsus avtomatlashtirilgan foto va video qayd etish qurilmalari orqali aniqlashga ruxsat berildi.
Ya’ni endilikda xavfsizlik kamarini taqmaslik holatlari nafaqat YPX xodimlari, balki texnik talablarga javob beradigan va ma’lumotlarni “Ma’muriy amaliyot” moduliga avtomatik ravishda uzatish imkoniyatiga ega maxsus qurilmalar orqali ham qayd etilishi mumkin.
Qarorda statsionar, ya’ni qo‘zg‘almas radarlar joylashgan hududlarda yo‘l belgilarini o‘rnatish talabi ham belgilangan. Unga ko‘ra, radar joylashgan hududda va undan 250 metrdan kam bo‘lmagan, 500 metrdan ko‘p bo‘lmagan masofada 5.43 yo‘l belgisi o‘rnatilishi majburiy hisoblanadi.
