Favqulodda vaziyat qurbonlari va jabrlanganlarga moddiy yordam: to‘lov miqdorlari belgilandi
Avariya, yong‘in, portlash va boshqa texnogen favqulodda vaziyatlardan zarar ko‘rgan fuqarolar 30 kun ichida tegishli komissiyaga murojaat qilishi kerak.
O‘zbekistonda texnogen xususiyatli favqulodda vaziyatlar oqibatida aholiga yetkazilgan zararni baholash va qoplash tartibi belgilandi. Bu haqda Hukumatning 606-son qarori (2026-yil 3-noyabr) bilan tegishli nizom tasdiqlandi.
Nizomga ko‘ra, texnogen xususiyatli favqulodda vaziyatlarga transport avariyalari va halokatlari, kimyoviy xavfli hamda yong‘in-portlash xavfi mavjud obyektlardagi hodisalar, energetika va kommunal tizimlardagi avariyalar, bino konstruksiyalarining to‘satdan buzilishi va boshqa holatlar kiradi.
Jabrlanganlarga yetkazilgan zarar tegishli tuman yoki shahar hokimligi huzuridagi maxsus jamg‘arma mablag‘lari hisobidan quyidagi holatlarda qoplab beriladi:
-
sud tomonidan favqulodda vaziyat uchun aybdor shaxslar aniqlanguniga qadar;
-
aybdor deb topilgan yuridik shaxslar yoki ularning mansabdor shaxslari belgilangan muddatda zararni to‘liq qoplash imkoniga ega bo‘lmagan hollarda.
Jabrlanganlar favqulodda vaziyat yuz bergan kundan boshlab 30 kun ichida belgilangan shakldagi arizani to‘ldirib, tegishli komissiyaga topshirishi lozim.
Komissiya dalolatnomasiga muvofiq, Qoraqalpog‘iston Respublikasi Vazirlar Kengashi Raisi, viloyatlar va Toshkent shahri hokimlarining qarorlari asosida quyidagi miqdorlarda bir martalik moddiy yordam to‘lanadi:
-
favqulodda vaziyat oqibatida halok bo‘lgan fuqarolarning oila a’zolariga (turmush o‘rtog‘i, farzandlari, ota-onalari va qaramog‘idagi shaxslar) — har bir oila a’zosiga teng ulushda BHMning 500 baravarigacha;
-
og‘ir tan jarohati olgan fuqarolarga — BHMning 200 baravarigacha;
-
o‘rtacha og‘irlikdagi tan jarohati olgan fuqarolarga — BHMning 150 baravarigacha;
-
yengil tan jarohati olgan fuqarolarga — BHMning 100 baravarigacha.
