5 ming dollar evaziga “Umra” va’dasi: Samarqandda firma xodimi ushlandi
Firma tegishli litsenziyaga ega bo‘lmagan.
Samarqand viloyatida fuqarolarni “Umra” ziyoratiga yuborishni va’da qilib, pul olgan sayyohlik firmasi xodimi ushlandi. Bu haqda Davlat xavfsizlik xizmati xabar berdi.
Ma’lum qilinishicha, Samarqand tumanida faoliyat yurituvchi sayyohlik firmasi xodimi Samarqand shahrida yashovchi fuqaroning ishonchiga kirib, uning to‘rt nafar qarindoshini Saudiya Arabistoniga “Umra” ziyoratiga yuborishni va’da qilgan.
U ushbu xizmat evaziga 5 ming AQSH dollari olayotgan vaqtida DXX va viloyat IIB xodimlari tomonidan ashyoviy dalillar bilan ushlangan.
Aniqlanishicha, mazkur mas’uliyati cheklangan jamiyat “Umra” tadbirlarini tashkil etish va o‘tkazish uchun tegishli litsenziyaga ega bo‘lmagan.
Hozirda holat yuzasidan surishtiruv ishlari olib borilmoqda.
