Qirg‘izistonda energetik ichimliklar taqiqlanishi mumkin: Japarov hukumatga topshiriq berdi
2025-yilda mamalakatda 129 million banka, 2026-yilning birinchi yarmida esa qariyb 85,9 million banka energetik ichimlik iste’mol qilingan.
Qirg‘iziston prezidenti Sadir Japarov mamlakatda energetik ichimliklar ishlab chiqarish va import qilishni taqiqlash masalasini ko‘rib chiqishni taklif qildi. U Vazirlar Mahkamasiga bir oy ichida ushbu masalani o‘rganish, olti oy ichida esa qonunchilik doirasida tegishli tartibga solish choralarini ko‘rish bo‘yicha topshiriq berdi.
Japarov bu haqda ijtimoiy tarmoqlardagi sahifasida yozdi.
Uning so'zlariga ko'ra, o'tkazilgan tahlillarga ko'ra, 2025-yilda Qirg‘izistonda energetik ichimliklar ichki iste’moli 54 million 199 ming litrni yoki taxminan 129 million bankani tashkil etgan. 2026-yilning birinchi yarmida esa iste’mol hajmi 36 million 83 ming litrga, ya’ni qariyb 85,9 million bankaga yetgan.
2025-yilda mamlakatda 25 million 263 ming litr energetik ichimlik ishlab chiqarilgan. Shuningdek, Yevroosiyo iqtisodiy ittifoqiga a’zo davlatlardan 28 million 430 ming litr, boshqa mamlakatlardan esa 1 million 239 ming litr mahsulot import qilingan.
Japarovning ta’kidlashicha, energetik ichimliklarni iste’mol qilish asta-sekin o‘rganib qolishga olib kelishi va odatga aylanishi mumkin. Shu sababli u kasalliklar oqibatlariga qarshi kurashish bilan birga, ularning oldini olishga qaratilgan choralarni ham ko‘rish zarurligini bildirgan.
Dastlabki hisob-kitoblarga ko‘ra, energetik ichimliklar ishlab chiqarish yoki import qilish taqiqlansa, Qirg‘iziston budjeti to‘g‘ridan-to‘g‘ri va bilvosita soliqlardan taxminan 1,5 milliard som (17,15 million dollar) daromad yo‘qotishi mumkin.
