Chiptasiz yurish holatlari ko‘paydi: 6 kunda 2 152 ta bayonnoma rasmiylashtirildi
Toshkentda 8 ta avtobus yo‘nalishi nazoratga olindi.
Toshkent shahrida jamoat transportida yo‘l haqini to‘lash intizomini mustahkamlash maqsadida nazorat tadbirlari kuchaytirildi. Xususan, poytaxtdagi 42, 56, 74, 84, 120, 169, 174 va 177-sonli avtobus yo‘nalishlari alohida nazoratga olindi. Bu haqda Transport vazirligi matbuot xizmati xabar berdi.
2026-yil 28-oktabrdan 2-noyabrga qadar o‘tkazilgan tekshiruvlar davomida yo‘l haqini to‘lamagan yo‘lovchilarga nisbatan Ma’muriy javobgarlik to‘g‘risidagi kodeksning 144-moddasi 5-qismiga asosan 2 152 ta ma’muriy bayonnoma rasmiylashtirildi.
Qoidabuzarliklar eng ko‘p quyidagi yo‘nalishlarda qayd etilgan:
-
174-yo‘nalishda — 291 ta;
-
120-yo‘nalishda — 286 ta;
-
56-yo‘nalishda — 284 ta;
-
169-yo‘nalishda — 284 ta.
Nazorat davrida ayrim yo‘nalishlarda yo‘lovchilar oqimi ham oshgan. Jumladan, 2-noyabr kuni 28-oktabrga nisbatan 174-yo‘nalishda tashilgan yo‘lovchilar soni 1 692 nafarga yoki 32,4 foizga, 56-yo‘nalishda esa 1 256 nafarga yoki 13,9 foizga ko‘paygan.
Ma’lum qilinishicha, olti kun davomida mazkur sakkizta yo‘nalishda jami 326 453 nafar yo‘lovchi tashilgan va 6 501 ta qatnov amalga oshirilgan.
