Belgilangan me’yor buzildi: Toshkent aeroportida 1 mlrd so‘mlik zargarlik buyumlari topildi
Aeroportda xorijdan kelgan yo‘lovchilarning yuklari va shaxsiy buyumlari tekshirilganda, jami 691 gramm zargarlik buyumlari aniqlandi.
Toshkent xalqaro aeroportida zargarlik buyumlarini belgilangan me’yorlardan ortiq miqdorda noqonuniy olib kirishga urinish bilan bog‘liq bir nechta holat aniqlandi. Bu haqda “Toshkent-AERO” ixtisoslashtirilgan bojxona kompleksi matbuot xizmati xabar berdi.
So‘nggi kunlarda Islom Karimov nomidagi Toshkent xalqaro aeroporti chegara bojxona posti xodimlari tomonidan turli xorijiy yo‘nalishlardan uchib kelgan yo‘lovchilarning yuklari va shaxsiy buyumlari tekshirilgan.
Tekshiruvlar davomida bojxona nazoratiga belgilangan tartibda taqdim etilmagan, umumiy og‘irligi qariyb 691 gramm bo‘lgan sariq rangli metalldan yasalgan zargarlik buyumlari aniqlangan.
Topilgan buyumlarning dastlabki qiymati jami 1 milliard 20 million 600 ming so‘mga baholangan.
Hozirda mazkur holatlar yuzasidan bojxona tekshiruvlari davom ettirilmoqda.
