Trampga suiqasd tahdidi: Oq uy yaqinida qurollangan erkak hibsga olindi
Uning avtomobilidan miltiq, ikkita to‘pponcha va o‘q-dorilar topilgan.
AQSh Maxfiy xizmati 5-noyabr kuni kechqurun Oq uy yaqinida prezident Donald Trampga suiqasd qilish bilan tahdid qilgan Venesuela fuqarosini qo‘lga oldi. Bu haqda Fox News AQSh Ichki xavfsizlik vazirligiga tayanib xabar berdi.
Qayd etilishicha, gumonlanuvchi Konstitutsiya avenyusida to‘xtab turgan, o‘g‘irlangan deb taxmin qilinayotgan avtomobil ichida bo‘lgan. Maxfiy xizmat agentlari uning shubhali xatti-harakatlariga e’tibor qaratgan.
Fox News ma’lumotiga ko‘ra, avtomobilni ko‘zdan kechirish davomida AR-15 rusumidagi miltiq, ikkita to‘pponcha va ko‘plab o‘q-dorilar topilgan.
Telekanal xabarida aytilishicha, gumonlanuvchi 2024-yil mart oyida Texas orqali AQShga noqonuniy kirgan va Chegara patrul xizmati tomonidan qo‘lga olingan. Biroq keyinchalik Bayden ma’muriyati davrida ozod qilingan.
Hozirda u AQSh Marshal xizmati hibsxonasida saqlanmoqda.
Maxfiy xizmat direktori Shon Kyorran mazkur hodisa himoya ostidagi shaxslarga nisbatan tahdidlar ortib borayotganini ko‘rsatishini bildirgan. Uning ta’kidlashicha, agentlik xavf tug‘dirishi mumkin bo‘lgan shaxslarni ular poytaxtga yetib kelishidan oldin aniqlash va tahdidlarning oldini olish ustida ishlashda davom etadi.
