Yamanda bozorga havo hujumi uyushtirildi: kamida 20 kishi halok bo‘ldi
Mahalliy ma’muriyat hujum yuzasidan qarama-qarshi ma’lumot bergan.
Yamanning janubi-g‘arbiy qismidagi bozorga uyushtirilgan havo hujumlari oqibatida kamida 20 kishi halok bo‘ldi, yana 15 kishi jarohatlandi. Bu haqda husiylar nazoratidagi Sog‘liqni saqlash vazirligi vakili ma’lum qildi.
Husiylar vakili Anis al-Sabohiy Al Masirah telekanaliga bergan intervyusida hujum Taiz viloyatining al-Vaziya hududidagi bozorga qaratilganini aytdi. Uning so‘zlariga ko‘ra, qurbonlar soni ortishi mumkin. U hujum uchun Saudiya Arabistoni boshchiligidagi koalitsiyani ayblagan.
Biroq Taiz mahalliy ma’muriyati voqea yuz berganini tasdiqlagan holda, hujum oqibatida odamlar halok bo‘lgani va jarohatlanganini bildirgan. Shu bilan birga, ma’muriyat hodisada husiylarni ayblab, hududda hech qanday havo hujumi amalga oshirilmaganini ta’kidlagan.
Associated Press agentligi hujum uchun mas’uliyat haqidagi qarama-qarshi da’volarni hozircha mustaqil ravishda tasdiqlay olmagan.
Mazkur voqea husiylar va Saudiya Arabistoni qo‘llab-quvvatlayotgan hukumat kuchlari o‘rtasidagi jangovar harakatlar qayta boshlanganidan buyon eng ko‘p qurbonlarga sabab bo‘lgan hujumlardan biri bo‘lishi mumkin.
