To‘rtta vagon alanga ichida qoldi: Hindistonda poyezd yonib ketti
Vagonlardan biridagi ventilyatorda qisqa tutashuv yuzaga kelgani yong'inga sabab bo‘lgan bo‘lishi mumkin.
Hindistonning Panjob shtatida Karmabhoomi Express tezyurar yo‘lovchi poyezdining to‘rtta vagonida yong‘in sodir bo‘ldi. Hodisa vaqtida poyezd Amritsar tomon harakatlanayotgan bo‘lgan. Bu haqda The New Indian Express xabar berdi.
Ma’lumotlarga ko‘ra, yong‘in Sarai Banjara temir yo‘l stansiyasi yaqinida yuz bergan. Yong‘in aniqlangach, xavfsizlik tizimi ishga tushirilgan va poyezd zudlik bilan to‘xtatilgan. Yo‘lovchilar vagonlarni tark etishga majbur bo‘lgan, ayrimlari esa harakatlanayotgan poyezddan sakrab tushgan.
Voqea joyiga politsiya va o‘t o‘chirish xizmati xodimlari yetib kelib, yong‘inni o‘chirish ishlarini boshlagan. Shimoliy temir yo‘lning jamoatchilik bilan aloqalar bo‘limi boshlig‘i Himanshu Shekhar Upadhyayning aytishicha, tegishli xizmatlar hodisa joyida ish olib borgan.
Ambala temir yo‘l bo‘limi boshlig‘i Vinod Kumar Bhatia nashrga bergan ma’lumotida hodisa oqibatida jabrlanganlar yoki halok bo‘lganlar haqida xabar kelib tushmaganini bildirgan.
Ma'lum qilinishicha, yong‘in vagonlardan biridagi ventilyatorda yuzaga kelgan qisqa tutashuv sababli boshlangan bo‘lishi mumkin.
Hozircha hodisaning barcha tafsilotlari va yong‘in oqibatlariga oid qo‘shimcha ma’lumotlar keltirilmagan.
