Jinoyatchilikni oldindan prognoz qilish tizimi joriy etiladi: dastlab qayerda sinovdan o‘tadi?
Jinoyatlarning sabablari, mas’ul idoralar va ko‘rilgan choralar natijalari yagona elektron platformada nazorat qilinadi.
O‘zbekistonda kriminogen vaziyat barqarorligini ta’minlash uchun Yagona kriminogen ma’lumotlar platformasi ishlab chiqiladi. Tizim orqali jinoyatlarning sabablari, mas’ul idoralar va ularni bartaraf etish choralari elektron tarzda nazorat qilinadi. Bu haqda 2026-yil 6-noyabrda qabul qilingan Prezidentning PF–241-son farmonida belgilangan.
Farmonga muvofiq, platformada jinoyatlarning obyektiv va subyektiv sabablari, mas’ul idoralar hamda mansabdor shaxslar, shuningdek, huquqbuzarliklarning oldini olish va ularni bartaraf etish choralari bo‘yicha elektron reyestr yuritiladi.
Ko‘rilgan choralar natijalari inson omilisiz oylik, yarim yillik va yillik tartibda nazorat qilinadi.
Shuningdek, hududlar, mahallalar va jinoyat turlari kesimida jinoyatchilik dinamikasi yarim yillik hamda yillik davrlar uchun prognoz qilinadi. Natijalarga ko‘ra, kriminogen vaziyati og‘ir hududlarga vaziyatni barqarorlashtirish choralarini nazarda tutuvchi xabarnomalar yuboriladi.
2027-yil yakuniga qadar platformani Toshkent shahrining Olmazor tumanida sinov tariqasida ishga tushirish rejalashtirilgan. 2028-yildan boshlab esa uni respublikaning barcha hududlariga bosqichma-bosqich joriy etish choralari ko‘riladi.
Farmonda har yili aholi o‘rtasida milliy viktimologik so‘rov, aholining xavfsizlik hissi va huquqni muhofaza qiluvchi organlarga ishonchi bo‘yicha ijtimoiy so‘rovlar o‘tkazish ham belgilangan.
Bundan tashqari, yoshlar, voyaga yetmaganlar, ayollar, muqaddam sudlangan va probatsiya hisobidagi shaxslar, “qizil” toifadagi mahallalar hamda boshqa yo‘nalishlar bo‘yicha manzilli kriminologik tadqiqotlar tashkil etiladi.
