O‘zbekistonda bankomatlar ishlab chiqarilishi yo‘lga qo‘yilishi mumkin
O‘tgan yili mamlakatga 9 mingta bankomat import qilingan.
O‘zbekistonda bankomatlarga bo‘lgan talab ortib bormoqda. O‘tgan yili mamlakatga 9 mingta bankomat xarid qilinib, 50 million dollardan ortiq mahsulot import qilingan.
Savdo va ko‘ngilochar majmualar, yangi uy-joy massivlari sonining ko‘payishi bilan bankomatlarga bo‘lgan ehtiyoj yanada oshishi kutilmoqda.
Shu munosabat bilan bankomatlarga bo‘lgan talabni hisob-kitob qilish, zarur texnologiyalar va investorlarni jalb etish orqali ularni mahalliy ishlab chiqarishni yo‘lga qo‘yish imkoniyatlarini o‘rganish vazifasi qo‘yildi.
Shuningdek, hududlarda elektrotexnika sanoatini rivojlantirish uchun bir qator yangi ishlab chiqarish yo‘nalishlari mavjudligi qayd etildi. Xususan, Toshkent viloyatida energiya batareyalari va elektronika uchun yupqa mis folgasi, Jizzaxda elektromobillar uchun invertorlar va zaryadlash qurilmalari, Namanganda suv nasoslari uchun energiya tejamkor elektr dvigatellar, Qoraqalpog‘istonda esa serverlar uchun uzluksiz elektr ta’minoti va sovitish tizimlarini ishlab chiqarish imkoniyatlari ko‘rib chiqilmoqda.
