Rektorlarga ogohlantirish berdim, ammo hech birini ishdan olmadim — Erkinjon Turdimov
Ta’lim va fan vaziri 5 nafar rektorning ishdan olingani haqidagi xabarlarga munosabat bildirdi.
Ta’lim va fan vaziri Erkinjon Turdimov besh nafar oliy ta’lim muassasasi rektori lavozimidan ozod etilgani haqidagi xabarlarni rad etdi. Uning aytishicha, yig‘ilishda to‘rt nafar rektorga qattiq ogohlantirish berilgan, vazirlikda esa ularning faoliyatini o‘rganish uchun maxsus ishchi guruh tuzilgan.
Ijtimoiy tarmoqlarda 6-noyabr kuni o‘tkazilgan yig‘ilishdan so‘ng bir qator universitet rektorlari, jumladan, O‘zbekiston davlat jahon tillari universiteti rektori Ilhomjon To‘xtasinov va Samarqand davlat chet tillari instituti rektori Bahodir Holiqov lavozimidan ozod etilgani haqida xabarlar tarqaldi.
Bosh vazirning birinchi o‘rinbosari, ta’lim va fan vaziri Erkinjon Turdimov samarqandlik jurnalist Karimberdi To‘ramurodga bergan intervyusida bu ma’lumotlarni inkor etdi.
“Avvalo, men hali beshta rektor emas, bittasini ham ishdan olmadim. Yig‘ilishda beshta emas, to‘rtta rektorni qattiq ogohlantirdim. Vazirlikda maxsus ishchi guruh tuzildi. Bu masala bilan ana shu katta va nufuzli guruh shug‘ullanadi. Qaysi rektor qolish-qolmasligi ishchi guruhning haqqoniy xulosasi asosida bo‘ladi”, — dedi vazir.
Turdimov suhbat davomida ayrim oliy ta’lim muassasalaridagi talabalar bilim darajasi yuzasidan o‘tkazilgan tekshiruv haqida ham gapirgan. Uning qayd etishicha, maqtalgan institutlardan birining rektori eng a’lochi talabalari sifatida taqdim etgan 10 nafar talaba standart testdan o‘tkazilgan. Biroq ularning birortasi ham uch baho ololmagan.
Jurnalist ta’lim tizimida korrupsiya avj olgani va soha tub o‘zgarishlarga muhtojligini ta’kidlab, vazirning bu boradagi rejalari bilan qiziqqan.
“Men siz aytgan kamchiliklarni yaxshi bilaman. Kurash oson bo‘lmaydi, albatta. Men ta’lim tizimida olamshumul inqilobiy o‘zgarishlar qila olmasman, ammo tizimda tartibni o‘rnataman”, — deya javob bergan Erkinjon Turdimov.
Suhbatda maktab darsliklaridagi xatoliklar masalasi ham ko‘tarilgan. Vazir darsliklarda xatolar ko‘pligini yaxshi bilishini aytib, ularning mazmuni bilan vazirlik bevosita shug‘ullanmasligini bildirgan. Uning so‘zlariga ko‘ra, darsliklar mazmuni va mohiyatiga oid takliflar bu yo‘nalish uchun mas’ul bo‘lgan Ta’lim markazi hamda Ilmiy tadqiqotlar institutiga yuborilgan.
