“Mavjud imkoniyatlarga nisbatan kam”: Prezident elektrotexnika sanoatini jadal rivojlantirish zarurligini ta’kidladi
So'ngi o‘n yilda elektrotexnika sanoatida 413 ta yangi ishlab chiqarish quvvati ishga tushirildi va 100 dan ortiq turdagi yangi mahsulot ishlab chiqarish yo‘lga qo‘yildi.
Shavkat Mirziyoyev elektrotexnika sanoati vakillari, sohada faoliyat yuritayotgan tadbirkorlar va investorlar bilan muloqot o‘tkazmoqda.
Uchrashuvda qayd etilishicha, keyingi o‘n yilda elektrotexnika sanoatiga 2 milliard dollar investitsiya kiritilib, 413 ta yangi ishlab chiqarish quvvati ishga tushirilgan. Natijada maishiy texnika, quyosh panellari, elektron hisoblagichlar va yuqori kuchlanishli transformatorlar kabi 100 dan ortiq turdagi yangi mahsulotlarni ishlab chiqarish yo‘lga qo‘yilgan.
Joriy yilda sohada mahsulot ishlab chiqarish hajmi 50 trillion so‘mga yetgan. Taqqoslash uchun, 2016-yilda bu ko‘rsatkich 1,7 trillion so‘mni tashkil etgan. Investitsiyalar hajmi 600 million dollarga, eksport esa 1 milliard 600 million dollarga yetkazilgan. O‘tgan davrda eksport 14 barobar o‘sgan.
Davlat rahbari erishilgan natijalar mavjud imkoniyatlarga nisbatan kam ekanini ta’kidlab, elektrotexnika sanoatini yanada jadal rivojlantirish zarurligini qayd etdi.
Sanoatning asosiy xomashyolaridan biri bo‘lgan mis ishlab chiqarishni ko‘paytirishga ham alohida e’tibor qaratilmoqda. Joriy yilda 3-mis boyitish fabrikasi ishga tushirildi. Ushbu loyiha hisobiga mis ishlab chiqarish hajmini 300 ming tonnaga, 2030-yilga borib esa 500 ming tonnaga yetkazish rejalashtirilgan.
Shuningdek, mamlakatda quyosh va shamol elektr stansiyalari, energiya saqlash quvvatlari barpo etilmoqda, hududlarda keng ko‘lamli qurilish ishlari olib borilmoqda. Kelgusi o‘n yilda hamkorlar bilan 450 milliard dollarlik loyihalarni amalga oshirish maqsad qilingan.
Ta’kidlanishicha, bu elektrotexnika mahsulotlari uchun ulkan va uzoq muddatli bozorni shakllantiradi. O‘zbekistonda mis va muhim minerallar zaxiralari, salohiyatli yoshlar, tajribali tadbirkorlar hamda hamkorlikka tayyor investorlar mavjud. Endilikda ushbu imkoniyatlarni yangi texnologiyalar va ishlanmalar bilan birlashtirish muhimligi qayd etildi.
