Avtobusda nomaqbul musiqa qo‘yildi: haydovchilarga tushuntirish berilmoqda
“Toshshahartransxizmat” avtobusdagi holat yuzasidan munosabat bildirdi.
Toshkent shahridagi 61-sonli avtobus salonida jamoat joyida eshitilishi nomaqbul bo‘lgan musiqa qo‘yilgani aks etgan murojaat ijtimoiy tarmoqlarda tarqaldi.
Mazkur holat yuzasidan “Toshshahartransxizmat” AJ ma’lumot berdi.
Qayd etilishicha, “Yangiobod” avtobus saroyida 61-sonli yo‘nalish haydovchilari bilan qo‘shimcha yo‘riqnoma o‘tkazilmoqda.
Unda haydovchilarga avtobus salonida baland ovozda musiqa qo‘ymaslik, yo‘lovchilarga noqulaylik tug‘dirmaslik, yo‘l harakati qoidalariga qat’iy rioya qilish hamda xizmat intizomiga amal qilish bo‘yicha tushuntirishlar berilmoqda.
Kompaniya kelgusida bunday holatlarga yo‘l qo‘ymaslik va yo‘lovchilarga sifatli hamda madaniyatli xizmat ko‘rsatish zarurligini ta’kidladi.
