Ziroat Mirziyoyeva COP31 doirasida O‘zbekiston milliy pavilyoniga tashrif buyurdi
Pavilyonda “Zamin” fondining “Eco-Schools Uzbekistan” loyihasi doirasida uzluksiz ekologik ta’lim tizimi taqdim etildi.
Antaliya shahrida bo‘lib o‘tayotgan BMTning Iqlim o‘zgarishi bo‘yicha Hadli konvensiyasi tomonlari konferensiyasining 31-sessiyasi (COP31) doirasida O‘zbekiston Respublikasi Birinchi xonimi, “Zamin” xalqaro jamoat fondi Vasiylik kengashi raisi Ziroat Mirziyoyeva mamlakatimiz milliy pavilyoniga tashrif buyurdi.
Pavilyon konsepsiyasi “Uzumzor – o‘tmish merosi, bugungi yechim, kelajak uchun ilhom” g‘oyasi asosida ishlab chiqilgan.
Tashrif davomida Ziroat Mirziyoyeva pavilyonda taqdim etilgan milliy ekologik loyihalar va tashabbuslar bilan tanishdi.
Jumladan, “Zamin” xalqaro jamoat fondi tomonidan amalga oshirilayotgan “Eco-Schools Uzbekistan” loyihasi ishtirokchilari Birinchi xonimga barcha ta’lim bosqichlarini qamrab oluvchi uzluksiz ekologik ta’lim tizimini taqdim etdilar.
Mazkur tizim maktabgacha va boshlang‘ich ta’lim uchun LEAF, umumta’lim maktablari uchun Eco-Schools, oliy va o‘rta maxsus kasbiy ta’lim muassasalari uchun esa Eco-Campus dasturlarini o‘z ichiga oladi.
O‘zbekiston milliy pavilyoni COP31 doirasida mamlakatimizda amalga oshirilayotgan ekologik islohotlarni xalqaro hamjamiyatga namoyish etish, tajriba almashish va barqaror kelajak yo‘lida hamkorlikni mustahkamlashga xizmat qilmoqda.
