Porshen va avtomobil ehtiyot qismlari orasidagi narkotiklar: ikki kishi ushlandi
Surxondaryoda narkotik moddalarni avtomobil ehtiyot qismlariga yashirib olib kirish va qabul qilib olish bilan bog‘liq holat fosh etildi.
Davlat xavfsizlik xizmati Chegara qo‘shinlari, Xizmatning Surxondaryo viloyati bo‘yicha boshqarmasi, bojxona va ichki ishlar organlari hamkorligida o‘tkazilgan tezkor tadbirda narkotik moddalarni avtomobil ehtiyot qismlariga yashirib, O‘zbekiston hududiga olib kirish holati aniqlandi.
Ma’lum bo‘lishicha, mamlakatga kirish uchun “Ayritom” chegara bojxona postiga kelgan, 1966-yilda tug‘ilgan Afg‘oniston fuqarosi boshqaruvidagi “Toyota” rusumli avtomobil tekshirilgan. Tekshiruv davomida avtomobil yukxonasidagi dvigatel porsheni va boshqa ehtiyot qismlar ichiga yashirilgan qariyb 400 gramm opiy topilgan.
Shundan so‘ng, mazkur fuqaroning Termiz shahrida vaqtincha yashab turgan xonadoni ham ko‘zdan kechirilgan. U yerdagi avtomobil ehtiyot qismlari ichidan yana 848 gramm opiy va 551 gramm geroin aniqlangan.
Keyingi tezkor tadbirlar narkotik moddalarni O‘zbekistonda qabul qilib olishi kerak bo‘lgan shaxsni aniqlashga qaratilgan. Natijada Denov tumanida yashovchi, 1993-yilda tug‘ilgan fuqaro Sho‘rchi tumani hududida ashyoviy dalillar bilan qo‘lga olingan.
Mazkur holat yuzasidan shaxslarga nisbatan Jinoyat kodeksining 28 orqali 246-moddasi 2-qismi hamda 273-moddasi 6-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.
