Kelib chiqishi noma’lum go‘sht: Qarshida xonadondan 425 kg go‘sht topildi
Go‘shtning iste’molga yaroqliligi yuzasidan laboratoriya tekshiruvi o‘tkaziladi.

Qashqadaryo viloyatining Qarshi shahridagi “Bo‘ston” mahallasida joylashgan xonadonlardan birida kelib chiqishi noma’lum bo‘lgan 425 kilogramm go‘sht mahsuloti aniqlandi.
Mazkur mahsulotlar belgilangan tartibda hujjatlashtirilib, iste’molga yaroqliligini aniqlash maqsadida Qashqadaryo viloyati Oziq-ovqat mahsulotlari xavfsizligi boshqarmasi laboratoriyasiga topshirildi.
Dastlabki o‘rganish natijalariga ko‘ra, xonadondan topilgan go‘sht iste’molga yaroqsiz deb topilgan. Hozirda laboratoriyada qo‘shimcha ekspertiza o‘tkazilishi rejalashtirilgan.
Ma’lumot uchun, Vazirlar Mahkamasining 2019-yil 8-maydagi 386-son qaroriga muvofiq, hayvonlarni go‘sht uchun so‘yish ixtisoslashtirilgan va mini so‘yish korxonalarida, belgilangan veterinariya-sanitariya talablari asosida amalga oshirilishi lozim.
So‘yilgan hayvon go‘shti veterinariya mutaxassislari tomonidan tekshirilib, uning iste’molga yaroqliligi yuzasidan tegishli xulosa rasmiylashtiriladi. Shuningdek, mahsulot haqidagi ma’lumotlar elektron axborot tizimiga kiritilib, go‘sht bo‘laklariga QR-kodli yorliq yopishtiriladi.
Go‘sht mahsulotlarini sotishda ham tegishli veterinariya hujjatlari va veterinariya-sanitariya ekspertizasi xulosasi bo‘lishi, mahsulotlar maxsus sovutkichli rastalarda saqlanishi hamda belgilangan talablarga muvofiq tashilishi shart.
Kelib chiqishi tasdiqlanmagan va veterinariya-sanitariya talablariga javob bermaydigan go‘sht mahsulotlarini sotishga yo‘l qo‘yilmaydi.








