Kumushkonda “Oltin bel” majmuasi barpo etildi: 600 ta ish o‘rni yaratildi
Majmua bir vaqtning o‘zida 6 ming nafargacha mehmonlarga xizmat ko‘rsatish imkonini beradi.

Prezident Shavkat Mirziyoyev Parkent tumanida qurilish materiallari sanoati va turizmni rivojlantirish masalalari yuzasidan investorlar hamda tadbirkorlar bilan uchrashuv o‘tkazdi.
Davlat rahbari bir yil avval Kumushkonda Bo‘stonliq va Zomindagi turistik zonalardan qolishmaydigan yirik majmua barpo etish vazifasi qo‘yilganini esladi. Mahalliy loyihachilar va quruvchilarga imkoniyat berish tamoyili asosida 47 gektar maydonda “Oltin bel” majmuasi bunyod etildi.
Majmuada to‘rtta mehmonxona, ikkita restoran, 51 ta chalet, akvapark, amfiteatr va boshqa ko‘ngilochar inshootlar tashkil qilingan. Bu yerda bir vaqtning o‘zida 6 ming nafargacha mehmonlarga xizmat ko‘rsatish va 600 ta ish o‘rni yaratish imkoniyati mavjud.
Xalqaro turizm akademiyasi tomonidan tashkil etilgan kurslarda 300 nafar mutaxassis tayyorlandi. Qurilish va jihozlashda mahsulotlarning 95 foizi mahalliy korxonalardan xarid qilingani loyiha tannarxini 20 foizga kamaytirishga imkon berdi.
Ushbu tajriba asosida Nanay, Xonobod, Chimyonsoy, Muzbuloq, Urgut, Ellikqal’a va boshqa hududlarda ham turizm maskanlarini barpo etish taklif qilindi.
Prezident qurilish industriyasi va turizm bir-birini to‘ldiradigan, o‘zaro yangi imkoniyatlar ochadigan sohalarga aylanishi zarurligini ta’kidladi.








