Toshkentda havo sifati yaxshilandi: bugun “yashil” daraja kutilmoqda
Hozirda atmosfera havosi sifati Maxsus komissiya tomonidan doimiy monitoring qilinmoqda.

20-noyabrga o‘tar kechasi Toshkent shahrida atmosfera havosi sifati yaxshilandi. Xalqaro havo sifati indeksi (AQI) bo‘yicha kechki soatlarda dastlab “sezgir guruhlar uchun nosog‘lom”, keyinchalik esa “o‘rtacha” daraja kuzatildi. Milliy indeks bo‘yicha esa dastlab “sariq”, tunning asosiy qismida “yashil” daraja qayd etildi.
Ma’lum qilinishicha, kechki soatlarda kuchsiz shamol mahalliy va qo‘shni hududlarda shakllangan tashlamalar hamda PM zarrachalarining tarqalishini cheklagan. Soat 22:00 dan keyin havo almashinuvi yaxshilanishi natijasida PM zarrachalari miqdori kamayib, havo sifati yaxshilangan.
Shuningdek, Ekologik monitoring milliy markazi mutaxassislari Toshkent shahri va Qibray tumanida havo sifati bo‘yicha instrumental o‘lchovlar o‘tkazgan.
Prognozlarga ko‘ra, 20-noyabr kuni poytaxtda havo sifati kunduzgi va kechki soatlarda xalqaro AQI bo‘yicha “o‘rtacha”, milliy indeks bo‘yicha esa “yashil” darajada bo‘lishi kutilmoqda.








