AI-80 bo‘yicha cheklov saqlanadi: Energetika vazirligi sababini tushuntirdi
Birja savdolariga chiqarilgan benzindan yuqori oktanli benzin va boshqa kimyoviy mahsulotlar ishlab chiqarishda foydalaniladi.

O‘zbekistondagi avtomobillarga yoqilg‘i quyish shoxobchalarida AI-80 benzini sotuviga qo‘yilgan cheklovlar saqlanib qoladi. Energetika vazirligi ijtimoiy tarmoqlarda tarqalgan xabarlarga munosabat bildirdi.
Vazirlik ma’lum qilishicha, birja savdolariga chiqarilgan AI-80 markali benzin qayta ishlash korxonalarida xomashyo sifatida foydalanish uchun mo‘ljallangan.
Ushbu mahsulot texnologik qayta ishlash orqali yuqori oktanli benzin va boshqa kimyoviy mahsulotlar ishlab chiqarishda qo‘llanilishi mumkin. Savdo shartlariga ko‘ra, uni faqat tegishli litsenziyaga ega qayta ishlash korxonalari xarid qilishi mumkin.
Vazirlik ta’kidlashicha, mazkur savdolar AI-80 benzinining AYoQShlarda sotuvga qaytarilishini anglatmaydi. Uni avtomobillarga yoqilg‘i sifatida sotish bo‘yicha amaldagi cheklovlar saqlanib qoladi.








