Suv avtomatlarini buzib, pulini o‘g‘irlashdi: olti nafar gumonlanuvchi ushlandi
Toshkentda ko‘chalardagi ichimlik suvi sotadigan avtomatlardagi pullarni o‘g‘irlash holatlari aks etgan videolar tarqaldi.

Ijtimoiy tarmoqlarda noma’lum shaxslarning ko‘chalarga o‘rnatilgan filtrlangan ichimlik suvi sotish avtomatlarini buzib, ichidagi pullarni o‘g‘irlayotgani aks etgan videolar tarqaldi.
Toshkent shahar Ichki ishlar bosh boshqarmasi matbuot xizmatining ma’lum qilishicha, holatlar poytaxtning Uchtepa va Yunusobod tumanlarida sodir etilgan.
Ko‘rilgan tezkor-qidiruv choralari natijasida mazkur jinoyatlarni sodir etishda gumonlangan olti nafar fuqaroning shaxsi aniqlanib, ular ushlangan. Ular 2004, 2007, 2008, 2010 va 2011-yillarda tug‘ilgan shaxslardir.
Mazkur holat yuzasidan Uchtepa tumani IIO FMB Tergov bo‘limi tomonidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilgan.
Hozirda gumonlanuvchilarning boshqa jinoyatlarga aloqadorligi ham tekshirilmoqda. Tergov yakunlariga ko‘ra qonuniy qaror qabul qilinishi ta’minlanadi.








