O‘zbekistonda ipoteka kreditlari 39,5 foizga oshdi: 10 oyda 23,6 trln so‘m ajratildi
Ajratilgan mablag'larning asosiy qismi birlamchi uy-joy bozoriga yo‘naltirilgan.

2026-yilning yanvar–oktabr oylarida tijorat banklari tomonidan jismoniy shaxslarga jami 75,8 mingta ipoteka krediti ajratildi. Kreditlarning umumiy hajmi 23,6 trln so‘mni tashkil etib, o‘tgan yilning mos davriga nisbatan 39,5 foizga oshdi. Bu haqda Markaziy bank ma’lum qildi.
Ajratilgan ipoteka kreditlarining asosiy qismi birlamchi uy-joy bozoriga yo‘naltirilgan. Ushbu segmentda 17,4 trln so‘mlik kredit berilib, o‘tgan yilning mos davriga nisbatan o‘sish 42 foizni tashkil etgan. Ikkilamchi uy-joy bozori uchun esa 6,2 trln so‘m kredit ajratilgan. Bu ko‘rsatkich 33 foizga oshgan.
Kreditlarning 12,2 trln so‘mi erkaklarga, 11,4 trln so‘mi ayollarga to‘g‘ri kelgan. Bir yil ichida erkaklarga ajratilgan ipoteka kreditlari hajmi 20,9 foizga, ayollarga ajratilgan kreditlar esa 67 foizga oshgan.
Yoshlar uchun ajratilgan ipoteka kreditlari soni 22,3 mingtaga yetib, 36,5 foizga ko‘paygan. Ushbu kreditlarning umumiy qiymati 7,2 trln so‘mni tashkil etgan. Bu o‘tgan yilning mos davriga nisbatan 42,9 foizga ko‘p.








