Bir tashrifda 30 kungacha: O‘zbekiston va Ummon o‘rtasida vizasiz tartib joriy etiladi
Yil davomida vizasiz bo‘lish muddati jami 180 kundan oshmasligi lozim.

O‘zbekiston Prezidentining Ummonga davlat tashrifi doirasida ikki mamlakat hukumatlari o‘rtasida o‘zaro vizadan ozod qilish to‘g‘risidagi bitim imzolandi.
Tashqi ishlar vazirligi ma’lum qilishicha, 17-noyabr kuni imzolangan hujjat muqaddima va 14 ta moddadan iborat.
Bitimga muvofiq, ikki davlat fuqarolari amal qilish muddati kamida olti oy bo‘lgan xorijga chiqish biometrik pasporti orqali bir-birining hududiga vizasiz kirishi, tranzit o‘tishi va chiqishi mumkin bo‘ladi.
Vizasiz bo‘lish muddati har bir tashrifda 30 kungacha, bir kalendar yili davomida esa jami 180 kundan oshmasligi kerak.
Mazkur tartib doimiy yashash, o‘qish yoki mehnat ruxsatnomasini talab qiladigan faoliyatga tatbiq etilmaydi. Belgilangan muddatdan ortiq qolish uchun qabul qiluvchi davlat qonunchiligiga muvofiq viza rasmiylashtirish talab etiladi.
Hujjatda fors-major holatlarida bo‘lish muddatini bepul uzaytirish, pasport yo‘qotilgan yoki shikastlangan taqdirda vaqtinchalik yo‘l hujjatini berish hamda nomaqbul deb topilgan shaxslarning kirishini rad etish yoki bo‘lish muddatini qisqartirish tartiblari ham belgilangan.
TIV ma’lumotiga ko‘ra, bitim tomonlar uning kuchga kirishi uchun zarur ichki tartib-taomillarni bajargani haqidagi so‘nggi yozma xabarnomani olgan kundan boshlab 30 kun o‘tgach kuchga kiradi.








