Япония АҚШ ядровий қуролларини мамлакатга жойлаштириш масаласини муҳокама қилмоқда
Токио хавфсизлик таҳдидлари ортиб бораётгани сабаб “уч ядровий тамойил”ни қайта кўриб чиқиши мумкин.
Япония бош вазири Санаэ Такаити мамлакат ҳудудида АҚШ ядровий қуролларини жойлаштириш борасида очиқ позицияни билдирди. Унга кўра, Токио ва Вашингтон ўртасидаги хавфсизлик ҳамкорлиги тобора муҳим тус олаётган бир пайтда бу масалани муҳокама қилиш вақти етган.
Мамлакатда 1960 йиллардан буён амал қилиб келаётган “уч ядровий тамойил” — ядро қуролига эга бўлмаслик, ишлаб чиқармаслик ва Япония ҳудудига киритмаслик — Япониянинг асосий ядро сиёсати саналади. Такаити фикрича, айнан учинчи тамойил — ядровий воситаларни киритмаслик — АҚШнинг Японияни ҳимоя қилиш борасидаги имкониятларини чеклаши мумкин.
Расмий Токио, хусусан, АҚШ ҳарбий базалари ва япон портларига кирувчи кемаларда ядро қуролини жойлаштириш тақиқланиши кучайиб бораётган минтақавий таҳдидларга жавоб қайтаришни қийинлаштираётганини таъкидламоқда. Шу боис, бош вазир бундай чекловлар миллий хавфсизлик нуқтаи назаридан қайта кўриб чиқилиши лозимлигини қайд этди.
