Kaliforniyada yashovchi 35 yoshli Ian Applegate uchun oddiy aksirish hayotini butunlay o‘zgartirib yubordi. Fevral oyining boshida rafiqasi Jennifer va to‘rt yoshli o‘g‘li Jon bilan avtomobilda ketayotganida, u qattiq aksirishni boshladi. Uchinchi aksirishdan so‘ng, Ian boshida kuchli og‘riq, bosh aylanishi va chap tomonida sanchiqli og‘riq his qildi.
“Tanamning butun chap tomoni qotib qoldi va men insultga uchraganimni angladim. Og'riq chidab bo‘lmas darajada edi. O‘zimni juda yomon his qildim, ko‘nglim ayniy boshladi", – deya eslaydi Ian.
Shoshilinch ravishda kasalxonaga yotqizilgan Ianga qonni suyultiruvchi dorilar berildi. Shifokorlarning aniqlashicha, u aksirish paytida uyqu arteriyasining ichki qoplamini yorib yuborgan, bu esa qon ivishiga sabab bo‘lgan. Natijada miyaga qon oqimi to‘silgan va insult yuzaga kelgan.
Hozirda Ian reabilitatsiya terapiyasidan o‘tmoqda. Uning singlisi Vanessa esa davolanish xarajatlarini qoplash uchun mablag‘ yig‘ish kampaniyasini boshlagan.


