Ijtimoiy tarmokda Andijon viloyatining Qo‘rg‘ontepa tumanida fermerlarning yerlari nohaq olib qo‘yilayotgani haqida xabar tarqaldi. Holat yuzasidan viloyat hokimligi matbuot xizmati rasmiy munosabat bildirdi.
Ma’lum qilinishicha, ushbu holat Qo‘rg‘ontepa tumani Dardoq qishlog‘ida joylashgan “Sharof Rashidov” massiviga oid bo‘lib, mazkur massiv 1800 gektar yer maydoniga ega.
114 ta fermer xo‘jalikka bo‘linib ketgan ushbu hududning ayrim joylari samarasiz foydalanish oqibatida hozirda qarovsiz holatga kelib qolgan. Hududdagi ko‘p maydonlardan meva yetishtirish va ekin ishlari qolib, boshqa maqsadlarda foydalanilgan.
Ta’kidlanishicha, shu massivda joylashgan “Yortiboshi” mahallasidagi 500 dan ortiq aholini ishsizlik va kambag‘allik muammosi qiynab keladi. Bu yerlik aholi oldindan “Uzumchilik” faoliyatini yaxshi bilgan, ammo fermer xo‘jaliklari tasarrufida bo‘lgan yerlardan foydalanish imkoni ularda bo‘lmagan edi.
2021 yilda mazkur holat bilan yaqindan tanishgan tuman hokimi, hudud faollari va nuroniylari bilan kengashgan holda, “Sharof Rashidov” massivi yer maydonlaridan o‘zini oqlagan yo‘nalishlarda foydalanish, samarasiz maydonlar o‘rnida uzumchilik klasterlarini tashkil etish orqali yangi texnologiyalar hamda ilmga asoslangan loyihalarni ishga tushirish taklifini ma’qullagan.
“Yerlardan samarali foydalanayotgan fermerlar mazkur holat bo‘yicha tushunmovchilikka yuz tutgan va ushbu suratlarni olishgan. Ammo, shu kunning o‘zida tuman hokimi fermerlar bilan uchrashgan va barcha masalaga oydinlik kiritib olinib, muammolar barham topgan”, —deyiladi xabarda.
Voqeadan bir oy vaqt o‘tib, ahamiyatini yo‘qotib bo‘lgan mavzudagi ushbu suratlar tarmoqlarga sizdirilgan. Hozirda ushbu muammolar to‘liq bartaraf etilgan.